Kulokhu kuqhubeke njalo ukwazisa amaciko kumncimbi I-Articulate Africa obanjelwe eThekwini Exhibition Centre, uhlelo luyaqhubeka nokuletha izingxoxo ezinamandla nezivusa ubumbano ezithinta ezobuciko, izincwadi, ukuxoxa izindaba kanye nokuvezwa kobuciko base-Afrika.
Izithameli zithole ithuba lokulalela nokuxhumana nabanye babantu abahlonishwayo kwezamasiko, ababhali, osolwazi nabaculi bakuleli.
Kulolusuku kube nezingxoxo ezijulile nezethulo zezincwadi ebeziholwa ngabantu abaziwayo okubalwa kubona umbhali wemidlalo yeshashalazi nomsunguli wenhlangano iKwaMashu Community Advancement Projects, Dr Edmund Mhlongo, isazi samasiko u-Dr Ashantewaa Ngidi, umlingisi nombhali wezincwadi u-Ayanda Borotho, umbhali odumile u-Dudu Busani, u-Dr Nakanjani Sibiya kanye nabanye abahlonishwayo emkhakheni wezincwadi, abezindaba nezobuciko.
Izingxoxo zibe sezidlulela ezihlokweni ezithinta umphakathi namasiko, okugcine kubambe iqhaza elikhulu lezethameli usuku lonke.
Ezinye zezihloko ebezixoxwa zihlanganise ukuzigqaja ngobuwena namasiko eNingizimu Afrika yangemuva kobandlululo, izinselelo zokukhulisa amadoda emphakathini wanamuhla, izingxoxo ngesithembu nezindaba ze-LGBTQI, kanye nendima esithuthukyo yabezindaba nezinkundla zokuxhumana ekwakheni imibono yomphakathi nasekulondolozeni izindaba namasiko ase-Afrika.
Kukhuthazwe umphakathi ukuthi wamukele izingxoxo njengendlela yokwakha isizwe nokugcina amasiko ephila.
Ngaphandle kwezingxoxo, i-Articulate Africa iphinde yahlotshiswa izinkondlo, umculo bukhoma, imidlalo yeshashalazi kanye nemibukiso yobuciko ekhombise ububanzi nobukhazikhazi bokusungula kwama-Afrika. Lolu hlelo luyaqhubeka nokuzibeka njengenkundla ebalulekile kwezamasiko, ehlanganisa ababhali, osolwazi, abaculi, abadlali nabantu bomphakathi ngenhloso yokugubha ubuhle nobuhlakani base-Afrika ngesikhathi kubhekwana nezinkinga ezibhekene nomphakathi wanamuhla.
Don’t miss what’s happening in your area. Subscribe for updates.
