I-Elangeni TVET College ivule ngokusemthethweni i-Artisan and Skills Development Centre kanye ne-Renewable Energy Training Centre Kwisikhungo esizinze e-Inchanga. Lo mcimbi, obubanjwe ngaphansi kwesiqubulo esithi “Skills Revolution Realised – From Skills to Production – From Training to Transformation,” uhlose ukuqinisa ukuthuthukiswa kwamakhono, ukuqeqeshwa kwezobungcweti kanye nokuvula amathuba emisebenzi entsheni nasemiphakathini.
Lesi sikhungo esisha siyingxenye yomzamo wokuguqula ukuqeqeshwa kube amathuba angempela okukhiqiza, ukuqashwa nokuthuthukisa umnotho. Sizophinde sigxile ekuqeqesheni abafundi ngobuchwepheshe bamandla avuselelekayo, ikakhulukazi ezinhlelweni zamandla elanga, ukuze bakwazi ukubamba iqhaza ekuguqukeni komkhakha wamandla eNingizimu Afrika.
Ekhuluma emcimbini, uDkt Nomusa Dube-Ncube uthe lesi sikhungo siyisinyathelo esibalulekile ekuhlomiseni abantu abasha ngamakhono ahambisana nezidingo zezimboni zesimanje.
“Siyawuhlonipha umlando ojulile nonencazelo enkulu walesi sikhungo, njengoba besilokhu sisebenzela iSkills Centre, izikole zabantu abakhubazekile, izikole zabangezwa kahle kanye nomphakathi obanzi. Lelifa libonisa ukuzibophezela kwesikhathi eside ekuthuthukiseni imfundo ebandakanya wonke umuntu, ukwesekwa komphakathi kanye nokuphakanyiswa kwezimo zokuphila zabantu. Namuhla sibona ukuqhubeka kwalowo msebenzi ngokuvulwa kwalesi sikhungo esizohlomisa intsha ngamakhono adingekayo ukuze ikwazi ukungena emnothweni futhi ibe negalelo ekuthuthukiseni izwe lethu,” kusho uDube-Ncube.
Uphinde wagcizelela ukuthi ukuthuthukiswa kwamakhono kuyisihluthulelo sokulwa nokungasebenzi kwentsha nokwakha umnotho oqinile.
“Asisakwazi ukukhuluma ngamathuba kuphela, kufanele sakhe amathuba. Lesi sikhungo siyisibonelo esicacile sokuthi imfundo namakhono kungaguqula kanjani impilo yabantu, kudale amathuba emisebenzi futhi kusekele ukukhula komnotho. Sifuna ukubona intsha yethu iba ngabakhiqizi, osomabhizinisi kanye nochwepheshe abazohola ikusasa laseNingizimu Afrika.” Kusho u Dube.
Isikhungo se-Renewable Energy Training Centre sakhiwe ngokubambisana phakathi kwe-Elangeni TVET College, i-Energy and Water Sector Education and Training Authority,umnyango wezemfundo ephakeme nokucijwa kwamakhono kanye ne-Chinese Culture and International Education Exchange Centre. Lesi sikhungo sizonikeza abafundi ukuqeqeshwa okusezingeni eliphezulu kwezobuchwepheshe bamandla avuselelekayo kanye nobunye ubuchwepheshe obudingeka kakhulu emakethe yomsebenzi.
U Zodwa Kula onguthisha nhloko wesikhungo I Elangeni TVET college uchaze lesisikhungo esethuliwe njengesiding esikhulu emphakathini wase Inchanga nowakhele lesisigodi.“ Umlando walesiskhungo samakhona sasivele siyisikhungo samakhono kwasekuqaleni sinikeza abantwana abaphila nokukhubazeka izifundo zamakhono ezahlukahlukene sibe sesiyithatha kumuntu ozimele sayithenga. Inhloso nqangi ukubafaka nabo laba bantwana ngaphansi kwezifundo ezenziwa layikhaya, ezinye zezifundo ezikhona ngaphakathi ukwakhiwa kwezindlu ukukhandwa kwamakhabethe Kanye nokusebenzisa ugesi welanga.” Kusho u Kula.
Don’t miss what’s happening in your area. Subscribe for updates.
