U Masipala we Theku uqinisekisa ukuthi izakhamuzi namabhizinisi zithola amanzi ngaphandle kokuphazamiseka kube yinto ehamba phambili kule minyaka emihlanu edlule.
Lokhu kuvezwe emkhankasweni wokwethula impumelelo yeminyaka emihlanu (2021–2026) ngaphansi kwesiqubulo esithi “Asimile Siyaqhuba: Resilience Through Adversity.”
UMnyango Wezamanzi Nezokuthuthwa Kwendle uveze ukuthi wenze utshalomali olukhulu ekwakheni nasekulungiseni ingqalasizinda yamanzi nezokuthuthwa kwendle.
Phakathi kwemisebenzi eqediwe kubalwa ukunwetshwa kwamadamu ase-Adams K5 no-K6, lapho i-K5 inyuswe isuka ku-2 yaya ku-6 megalitre, kwathi i-K6 yakhuphuka isuka ku-2 yaya ku-10 megalitre ukuze kuthuthukiswe ukugcinwa kwamanzi e-Adams Mission.
Ngo-2023 kwaphothulwa nedamu laseShongweni elinamandla okugcina amanzi angu-6 megalitre, kwathi isikhungo sokuhlanza amanzi saseMkhizwana sandiswa sakwazi ukuhlanza amanzi afinyelela ku-4 megalitre ngosuku, sisuka ku-1.5.
UMasipala uthe umsebenzi wokubuyisela ukusebenza kweNorthern Wastewater Treatment Works usuhambe ibanga elide, njengoba ikhwalithi yamanzi akhishwayo isihlangabezana namazinga angaphezu kuka-80%.
Kuyaqhubeka nokulungiswa kwezikhungo zokuhlanza indle e-Umbilo naseKwaNdengezi, ezalimala kakhulu ngesikhathi sezikhukhula. Kuphinde kuqhubeke ukufakwa kwamapayipi okudonsa amanzi emvula kulezi zindawo.
Isiteshi sokumpompa amanzi saseNtuzuma siphinde savulwa ngoDisemba nyakenye ngemva kokufakwa kwemishini emisha namaphampu angu-15, okuhloswe ngakho ukuthuthukisa ukusebenza nokwethembeka kwaso.
Kuphothulwe nomsebenzi wokulungisa isiteshi sokumpompa indle sase-uMdloti, lapho kufakwe khona amaphampu amabili amasha.
Ukuze kuhlangatshezwane nesidingo esikhulayo enyakatho yeTheku, kwakhiwe iNorthern Aqueduct Augmentation Pipeline kanye nepayipi elikhulu elihambisa amanzi lisuka eHazelmere liya eGrange Reservoir. Kuphinde kwalungiswa ibhuloho laseCanelands elithwala ipayipi lamanzi nabahamba ngezinyawo eVerulam, ukuqinisekisa ukuthi ukuhlinzekwa kwamanzi kuyaqhubeka ngaphandle kweziphazamiso.
Don’t miss what’s happening in your area. Subscribe for updates.
