Undunankulu wesifundazwe I KwaZulu-Natal, uThamsanqa Ntuli, ngokubambisana namalungu esigungu esiphezulu Sesifundazwe, uhole usuku lokubungaza intsha yango 1976 enyuvesi I DURBAN University of Technology ophikweni I Steve Biko campus.
Lo mcimbi, obuhanjelwe yizinkulungwane zabantu okubalwa kubo intsha, izinhlaka zikahulumeni nabaholi bomphakathi, ubuhlose ukukhumbula nokuhlonipha iqhaza eladlalwa yintsha yango-1976 emzabalazweni wenkululeko.
Ekhuluma kulo mcimbi, uNtuli uthe impi ebhekene nentsha yanamuhla yehlukile kuneyezizukulwane ezedlule. Uthe esikhundleni sokulwa nengcindezelo yezepolitiki, intsha kufanele ibambe iqhaza ezinqubweni zentando yeningi ngokubhalisela ukuvota nokukhetha abaholi abanekhono, abanobuqotho nabangakwazi ukuholela izwe ekuthuthukeni.
“Intsha yango-1976 yasabela obizweni lwenkululeko ngesibindi esingavamile. Kungakapheli neminyaka eyi-18, kusukela emigwaqweni yaseSoweto kwaze kwafika ukuntwela kwentando yeningi ngo-1994, iNingizimu Afrika yafeza lokho okwake kwabonakala kuyiphupho elingenakufezeka. Inkululeko yezepolitiki yanqotshwa.Ilungelo lokuvota, lokukhuluma ngokukhululeka, lokuzihlanganisa nokuhlela, kanye nelokuzinqumela ikusasa lethu ngokuhlanganyela, kwaba yifa labo bonke abantu baseNingizimu Afrika.” Kusho u Ntuli.
U Ntuli uhlabele phambili wathi umlando ufundisa ukuthi inkululeko ayisona isiphetho sohambo, kodwa iwuhambo uqobo lwayo. Eminyakeni engama-32 emva kokuzuza inkululeko yezepolitiki, esinye isizukulwane sentsha yaseNingizimu Afrika simi phambi kwabo siphethe isicelo esihlukile, kodwa esiphuthuma ngokufanayo.
“Le ntsha ibuza ukuthi ayikhululekile yini kuphela ngokomthetho, kodwa ukuthi ikhululekile yini ngokwamathuba empilo. Ibuza ukuthi inkululeko ingabe ingalinganiswa yini ngokutholakala kwemfundo esezingeni, amathuba omsebenzi ahloniphekile, ubusomabhizinisi, umhlaba, ubuchwepheshe kanye nokubamba iqhaza ngokugcwele emnothweni wezwe.” Kusho u Ntuli.
U Ntuli ukubeke kwacaca ukuthi kuwumthwalo wabo ukuqinisekisa ukuthi isithembiso sentando yeningi sigcwaliseka ngokuphelele. Bazohlonipha amaqhawe ka-16 Juni hhayi ngokukhumbula ukuzidela kwawo kuphela, kodwa nangokuqedela umsebenzi awawuqala.
Don’t miss what’s happening in your area. Subscribe for updates.
