Iqembu iTwo For Joy FC linqobe iKhabba Cup ka-2026 ngemuva kokushaya i-Ashley United kowamanqamu eKing Zwelithini Stadium ngeSonto.
ITwo For Joy FC ifinyelele kowamanqamu ngemuva kokunqoba iLagos FC kowandulela amanqamu. Iqembu likhombise ukuzimisela nokudlala kahle kwaze kwaba sekugcineni, lagcina lithwele indebe.
Umqeqeshi waleli qembu, u-TK Khoza, uthe uyajabula ngomsebenzi owenziwe abadlali bakhe. Uthe ukunqoba le ndebe kuwumphumela wokuzikhandla nokusebenzisana kweqembu lonke.
IKhabba Cup yasungulwa ngo-2021 ngowayengumdlali we-AmaZulu FC, u-Manqoba Mkhize, ngenhloso yokuthuthukisa ibhola lomphakathi nokunikeza abadlali abasebancane amathuba okubonisa amakhono abo. Lo mqhudelwano usukhule waba ngomunye wemikhulu KwaZulu-Natal, uheha amaqembu nabahloli bamathalente abavela ezindaweni ezahlukene.
UMkhize uhalalisele iTwo For Joy FC ngokunqoba futhi wabonga abaxhasi, amaqembu nabalandeli ngokweseka lo mqhudelwano.
“Ukufinyelela emqhudelwaneni wesihlanu weKhabba Cup kuyimpumelelo enkulu kithina. Siyaziqhenya ngokukhula kwalo mqhudelwano eminyakeni edlule. Siyahalalisela iTwo For Joy FC ngokunqoba futhi sibonga abaxhasi, amaqembu nabalandeli ngokweseka iKhabba Cup,” kusho uMkhize.
Owezokuxhumana kwa-Hollywoodbets, u-Menzi Ngcobo, uthe lo mqhudelwano usiza ukuthuthukisa ibhola lamazinga aphansi futhi uvulele abadlali amathuba okugqama.
“IKhabba Cup ayisewona nje umqhudelwano webhola kuphela, kodwa iyinkundla enika abadlali ithuba lokukhombisa amakhono abo nokufeza amaphupho abo. Siyaziqhenya ngokweseka imizamo ethuthukisa ibhola lomphakathi futhi iveze amathalente amasha.” kusho Ngcobo.
Ukuqhubeka kwe Khabba cup kukhombisa ukukhula kwezinga lokwesekwa kwemidlalo nokubonakala kwamathalente kubadlali abasakhula abasemphakathini.
Don’t miss what’s happening in your area. Subscribe for updates.
