Izinkundla zokuxhumana sezizakhele udumo olukhulu kubantu ngezinto eziningi ezingezinhle nezidicilela phansi isithunzi sabanye abantu. Lokhusekuze kwenza umuntu azibuze ukuthi ngabe into ekuthiwa ubuntu isekhona yini emhlabeni. Nokho akusibona bonke abantu abasebenzisa izinkundla zokuxhumana ukudicilela phansi isithunzi okanye benze ubugebengu. Ubufakazi balokhu kugqame ngesikhathi insizwa esencane yaseMthwalume izibophezela ekushintsheni izimpilo zabantu ngekhasi eliqale enkundleni yezokuxhumana uFacebook.
UGugu Prince Gasa ongumsunguli walelikhasi elaziwa ngokuthi iConsolidated Mthwalume Citizens unetshisekelo yokuguqula isimo sezimpilo zabantu abaningi kulendawo ngokubanikeza izinsiza zasezindlini kanye nokudla kuleyo mindeni entulayo. UGasa uthe indawo yaseMthwalume inabantu abaningi abangakwazi ukususa ikati eziko ikakhulukazi esikhathini samanje njengoba imisebenzi ingekho.
“Intsha iyafunda kodwa imisebenzi ayitholakali kanjalo nabantu abadala abahlala nabazukulu. Ngakho ngibone sikhona isidingo sokuthi ngakhe ikhasi elizokwazi ukuhlanganisa labo abangakwazi ukuphosa esivivaneni ukuze kubekhona imindeni elala idlile”, kusho uGasa
Lelikhasi elikhula ngesivivini esiphezulu lithole ukuxhaswa kakhulu osomabhizinisi kanye nabanye abantu abanesifiso sokusiza ukuthuthukisa izinga lempilo kubantu baseMthwalume. UGasa uveze ukuthi zikhona izinsizwa kanye nezintokazi asebenzisana nazo ukuqinisekisa ukuthi kuleli khasi akudicilelwa phansi isithunzi sabantu futhi alichemi ngokwezepolitiki futhi alicwasi ngokobulili.
UGasa uphethe ngokuthi okubanika intshisekelo yokuqhubeka nalokhu akwenzayo ukuthola izingcingo ezivela ezindaweni ezakhele uMthwalume zifisa ukuthola amacebo kanye nosizo ukuze kuguqulwe isimo sempilo emiphakathini yabo.
Don’t miss what’s happening in your area. Subscribe for updates.
