Umasipala weTheku wethule ngokusemthethweni uhlelo lwesibili lweKhwaya i-eThekwini Gospel Music Crescendos, emcimbini obubanjelwe e-Inkosi Albert Luthuli International Convention Centre.
Lo mcimbi uveze esinye isigaba esibalulekile emizamweni kaMasipala yokukhulisa nokuthuthukisa ithalente lomculo entsheni yendawo.
Le khwaya yakhiwe ngamalungu angama-22 entsha akhethwe ngohlelo lokusesha amathalente nokuhlolwa kwamakhono olwenziwe kuzo zonke izingxenye zeTheku.
Lolu hlelo lunikeze abaculi abasafufusa bomculo wokholo ithuba lokuveza amakhono abo, ngesikhathi kudalwa namathuba okubasiza bakhe imisebenzi esimeme embonini yezobuciko nokuzijabulisa.
Amalungu ale khwaya entsha ashiye izethameli zibambe ongezansi ngesikhathi enza okokuqala umsebenzi wokurekhoda bukhoma. Inkundla ibigcwele phama njengoba izakhamuzi, abathandi bomculo wevangeli nabalandeli behlangene ukuzobungaza ukwethulwa kwale khwaya.
Ekhuluma kulo mcimbi wokurekhoda bukhoma, u-Dr Simphiwe Ndlovu, onguMqondisi Wezokungcebeleka NamaPaki kumkhandlu we Theku, uthe uhlelo lwe-eThekwini Gospel Music Crescendos lwasungulwa ngenhloso yokuhlonza, ukukhulisa nokunika amandla abaculi abasebasha abanekhono ngomculo, ngokubaxhumanisa nokuqeqeshwa ngobungcweti, ukuqondiswa ngabacebisi kanye namathuba okuziveza ezinkundleni zokucula.
“Njengengxenye yokuthuthukiswa kwabo, amalungu ekhwaya athole ukuqeqeshwa okuqhubekayo nokuqondiswa ngabaculi abahlonishwayo kanye nochwepheshe bemboni yomculo. Lokhu kubasizile ekuthuthukiseni amakhono abo okucula, indlela abazethula ngayo esiteji kanye nokuqonda ukusebenza kwemboni yomculo. Baphinde bathola isikhathi eside sokuziqeqesha nokuzilolonga ukulungiselela lo mcimbi omkhulu wokurekhoda bukhoma,” kusho uNdlovu.
Impumelelo yokwethulwa kwale khwaya kanye nokurekhodwa kwayo bukhoma iveze ngokusobala ukujula kwamathalente akhona emiphakathini yaseThekwini, yaphinde yaqinisekisa ukuzibophezela kukaMasipala ekutshaleni izimali kwezobuciko namasiko njengendlela yokuthuthukisa intsha, ukuqinisa ubumbano emphakathini kanye nokudala amathuba omnotho.
UMasipala uhalalisele amalungu angama-22 ekhwaya ngale mpumelelo futhi wawafisela okuhle kodwa njengoba eqala uhambo lwawo emkhakheni womculo.
Umkhandlu uthe uzoqhubeka nokwakha izinkundla namathuba azovumela abaculi bendawo ukuthi bathuthukise amakhono abo futhi babelane ngamathalente abo nezethameli zaseNingizimu Afrika nakwamanye amazwe.
Don’t miss what’s happening in your area. Subscribe for updates.
