0
0
Isikhulu seqembu AmaZulu FC uMnuz Sandile Zungu uphumele obala ngesifiso sokuthi iqembu lakhe liqede isizini ka2024/25 yeBetway Premiership ku-Top 4.
UZungu ubekhuluma emcimbi woSuthu wokwethulwa abaxhasi nabadlali abasha, eMoses Mabhida Stadium, eThekwini ngoMsombuluko mhlaka 29 kuJuly.
“Nasekuqaleni ngaphendulwa ihlaya ngithi ngifuna sibe ku top 4,nampela saqeda sihlezi kunombolo yesibili. Nakulo nyaka sizibekele umbandela wokuqeda phakathi kwamaqembu amane aphezulu kwiligi,” kusho uZungu.
Ephetha uthe, abadlali, ithimba labaqeqeshi nabasebenzi bonke bakulungele ukwenza umsebenzi wabo ukuze kufezeke lesi sifiso seqembu.
Sebebonke abadlali basha oSuthwini, umgadli ovela kwiSinkani FC uSenzo “Mbhobho” Ndlovu,umdlali wasemuva uKwanda Mngonyama osuka kwiMoroka Swallows FC,uBoniface Haba(27) ongumgadli waseGuinea obedlelela i-Olympic Club de Safi, uLuvuyo Phewa (24) odlala eswini nomgadli u-Etiosa Godspower Ighodaro(23) bobabili ababolekwe kwiMamelodi Sundowns.
AmaZulu aphinde aqinisekisa ukuthi asayinise uThato Matli noLeonardo Rooi abazobolekiswa kwamanye amaqembu ukuze baqine ukhayikhayi.Leli qembu liphinde lethula inkampani yezobuchwepheshe i-Amandla Mobile njengabaxhaso abasha.
