0
0
Ivalwe ngegiya eliphezulu ingqungquthela yomkhakha wezokuvakasha enkulukazi i-Africa’s Travel Indaba ebisengethwe e-Inkosi Albert Luthuli International Convention Centre eThekwini,eyayivulwe NgoMsombuluko womhlaka-13 May yavalwa NgoLwesine womhlaka-16 May.
Kubeyinjabulo kwizinhlaka ezahlukene ezihlela lomcimbi ukuba sezingeni eliphezulu kwawo.
Kulezinhlaka kukhona uMnyango wezokuvakasha kuzwelonke,uMnyango wezokuvakasha KwaZulu-Natal,Abaphathi be-Inkosi Albert Luthulu International Convention Centre kanye noMnyango wezokuvakasha kuMasipala waseThekwini.Sinyuke ngo-7 % isibalo sezivakashi ebeziyingxenye ye-Africa’s Travel Indaba uma siqhathaniswa nosonyaka owedlule (2023),njengoba bezingu-9000 izivakashi kulonyaka.
Bebengu 1200 osomabhizinisi abathole ithuba lokukhangisa amabhizinisi abo kuzivakashi ebezivela emazweni ahlukene lapha ezwenikazi i-Afrika.Indawo yokukhangisa amabhizinisi ibisingethe abahwebi abavela emazweni engu-26,lokhu bekunikeza izivakashi ithuba lokufunda ngemikhiqizo yamazwe ahlukene.
“Ngokusingatha ngempumelelo i-Africa’s Travel Indaba iTheku likhombise ngokusobala ukuthi lisayigcinile indawo yalo yokuhlala esicongweni kwezokuvakasha ,okusho ukuthi siyiTheku sisahamba phambili kulomnyango.Siyazihlonipha izivakashi zethu ingakho siqale sabanezinhlelo ezifana ne-Durbanites Program lapho ebesifundisa khona osomabhizinisi,imiphakathi,abahlali balapha eThekwini kanye nabasebenzi basezindaweni zokudla ngokuthi ziphathwa kanjani izivakashi.Lokhu besikwenza ngoba kuwumsebenzi wawo wonke umuntu ohlala eThekwini ukuqhakambise indawo yethu” kubeka oyinhloko yoMnyango wezokuvakasha eThekwini uNks Winile Mntungwa.
Eqhuba uMntungwa uthe ukuba impumelelo kwalengqungquthela kukhombisa ukuthi iTheku selibuyele ezingeni lalo ngemuva kokuphazanyiswa isifo se-Corona Virus Diseases 2019 (COVID19) esaphazamisa kakhulu umkhakha wezokuvakasha ngenxa yokuvalwa thaqa kwezwe.Wathi i-Africa’s Travel Indaba iphinde yakhuphula umnotho weTheku njengoba ikwazile nokufukula osomabhizinisi abancane.
