1
0
Ukhuze amaqembu ezombusazwe ukuba engathathi inkinga yamanzi ekhungethe iTheku, ayiphendule umdlalo wezepolitiki uMeya woMkhandlu waseThekwini ukhansela Mxolisi Kaunda,uveze lokhu esithangamini sabezindaba ebesibanjelwe eCity Hall,eThekwini NgoLwesine womhlaka-25 January.
Lomkhandlu ubize isithangami sabezindaba ngenhloso yokwethula ngokusemthethweni izinhlelo zokulungiswa kwengqalasinda yamanzi.Lokhu kuza ngemuva kokuthi izindawo ezingaphansi kwaloMasipala zikhahlanyezwe imvula NgoMgqibelo womhlaka-13 January,lemvula yadlula nemiphefumulo yabantu abangu-9 ,yaphinde yacekela phansi amapayipi amakhulu,okwashiya izakhamuzi zinenkinga yokuthola amanzi.
Ekhuluma uMeya weTheku uMnu Mxolisi Kaunda uthe uMasipala uyasebenzisana nenhlangano emele amalungelo abantu,i-Human Rights Commission odabeni lokulunisa ingqinamba yamanzi.Ukaunda unxuse amaqembu ezombusazwe ukuthi akhuthaze amakhansela awo ukuba enze umsebenzi wokuletha intuthuko kubantu.
“Ingqalasizinda yamanzi ibalulekile ayidingi umdlalo wezepolitiki ikakhulukazi njengoba ipolitiki ijikelana,kunabantu ababehlekisa ngolwandle lwaseThekwini ngonyaka ka-2022 bethi lungcolile, ngonyaka odlule(2023) bekungcole ulwandle lwaseKapa lapho abathi baphethekahle khona” kusho uKaunda.
Eqhuba uMeya uMxolisi uthe ingqalasizinda yamanzi ifuna kusetshenzwe ngokubambisana,ebala izinkampani ezizimele,izinkampani zikahulumeni kanye nomphakathi.uKaunda uphinde wanxusa izakhamuzi zaseThekwini ukuba zingavali imigwaqo ngenhloso yokuzwakalisa izikhala zamanzi ngoba lokho kwenza kubenzima ukuthi amaloli athwala amanzi kanye nezisebenzi zomkhandlu zifinyelele kuleyondaba.
