Umasipala womkhandlu weTheku uyaqhubeka nokuqinisa amathuba amabhizinisi endawo okufinyelela ezimakethe zamazwe, ukuthola abatshalizimali kanye nokwandisa ukuwebelana, njengoba kuqhubeka ingqungquthela yesithathu ye-reSURGEnce Durban Conference.
Le ngqungquthela yakhela phezu kwempumelelo yezingqungquthela ezimbili ezedlule, ezaba nesandla ekufakeni imali elinganiselwa ezigidini ezi-R127 emnothweni wedolobha.
Uhlelo lwezinsuku ezinhlanu luqale ngoMgqibelo, mhla zingama-24 kuMfumfu 2026, ngokwamukelwa kwezicukuthwane okusingathwe yiMeya yaseThekwini eCoast of Dreams, eDurban Exhibition Centre. Lo mcimbi wamukele izithunywa zamazwe abaholi bamabhizinisi kanye nabalingani abazobamba iqhaza kule ngqungquthela.
Le ngqungquthela ihlelwe uMasipala weTheku ngokubambisana neThe New York Christian Times, kanti izoqhubeka kuze kube umhla zingama-28 kuMfumfu ngaphansi kwesiqubulo esithi, “Ukunciphisa Izithiyo Ngokwandisa Amathuba Okufinyelela.”
Kunezivakashi eziqhamuka kwamanye amazwe ezingaphezu kwe-100 ezivela e-United States, eJapan, e-Eswatini, eZimbabwe, eZambia, e-Uganda, eKenya kanye nase Nigeria.
Ngomhla zingama-26 nangama-27 kuMfumfu, kubene nengqungquthela enkulu ehambisana nombukiso lapho amabhizinisi acishe abe yi-150 ekhangisa ngemikhiqizo nangemisebenzi yawo.
U meya womkhandlu iTheku uKhansela uCyril Xaba, uveze ukuthi izingqungquthela zango-2024 nango-2025 zaba negalelo elihlangene elingama-R127 million emnothweni wedolobha, kanti zisize nasekusekeleni amathuba emisebenzi alinganiselwa ku-190 ngonyaka.
U-Xaba uthe le ngqungquthela iqinisa isikhundla seTheku njengesango elixhumanisa amabhizinisi nezimakethe zase-Afrika nezamazwe ngamazwe, iphinde idale amathuba okuthi osomabhizinisi bendawo baxhumane nabatshalizimali, bathole izimakethe ezintsha futhi bakhe ubudlelwano obubalulekile kwezamabhizinisi.
Uthe kubalulekile ukuthi lokhu kuxhumana kuveze imiphumela ebonakalayo kwezomnotho, kukhulise amabhizinisi futhi kusize ekudaleni amathuba emisebenzi ahlala isikhathi eside.
Umsunguli kanye nomxhumanisi we-reSURGEnce e-United States, uDennis Dillon, uthe ukuletha umhlaba eThekwini akugcini ngokuvula izimakethe ezintsha kuphela, kodwa kuphinde kuvule amathuba okuthuthukisa amakhono abantu nokuxhumanisa ubuhlakani base-Afrika nemali evela kubatshalizimali bamazwe ngamazwe.
Don’t miss what’s happening in your area. Subscribe for updates.
