UMeya womkundlu ITheku, uKhansela Cyril Xaba, uvule ngokusemthethweni i-Eleventh Avenue Interchange eClermont, okuyiphrojekthi ebize u-R312 million, njengoba uhlelo lwezokuthutha olusheshayo i-Go!Durban Integrated Rapid Public Transport Network selulungiselela ukuqala ukusebenza ngoZibandlela. Lezitobhi zitholakala kuDumisani Makhaye Highway. Uyingxenye ebalulekile ye-C3 Corridor exhumanisa iBridge City nePinetown, ngenhloso yokunciphisa isiminyaminya emigwaqweni nokwenza ukuhamba kwabantu phakathi kwezindawo ezahlukene kube lula.
I-Eleventh Avenue Interchange, eqedwe ngo Nhlangulana kulo nyaka, isiza ukuxhumanisa imiphakathi yaseBerkshire Downs, eClermont naseKwaDabeka. Umasipala uthi lolu tshalomali olukhulu kwingqalasizinda yemigwaqo luzosiza ekuthuthukiseni ukuhamba kwezimoto, ukuphepha emigwaqweni kanye nokwenza kube lula ukufinyelela ezindaweni ezahlukene kubashayeli bezimoto nabahamba ngezinyawo.
Ngemuva kokuvulwa ngokusemthethweni kwale ndawo, uXaba udlulisele izindlu kubahlali baseWadi 22. U Xaba uphinde waya kobheka umsebenzi oqhubekayo eKloof Extensions 15 no-21 Housing Project, ngaphambi kokuthi hlangane nabahlali emhlanganweni womphakathi obuseSugar Ray Xulu Stadium.
Ngesikhathi ekhuluma nabahlali, uXaba uthe uMasipala uhlela ukukhulisa utshalomali esifundeni esisentshonalanga yeTheku ukuze kuvulwe amathuba emisebenzi kubantu bakulezi zindawo.
“Siyaqhubeka nokuheha abatshalizimali ukuthi batshale imali edolobheni ngoba siyaqonda ukuthi uma umnotho ukhula, imindeni iyakwazi ukubeka ukudla etafuleni. Lomsebenzi udle imali elinganiselwa ku R9.5 Billion. Kube nokuxoxisana phakathi kwemboni yamatekisi kanjalo nabamabhasi, ngokuxoxisana nezimboni kuzosebenza ithikithi elilodwa elizosebenza emabhasini, estimeleni kanye nasetekisini. kusho uXaba.
UXaba uphinde wagcizelela ukuthi ukuhlinzekwa kwezindlu ezifanele kube semqoka kakhulu kuMasipala, njengoba lokhu kuhloswe ngakho ukubuyisela isithunzi kubahlali.
Don’t miss what’s happening in your area. Subscribe for updates.
