IMeya yomkhandlu weTheku, Cyril Xaba, ithe iyajabula ngenqubekela phambili yomsebenzi wokwakhiwa kwesikhungo iSakhithemba Homeless Shelter e-Illovu, eningizimu yeTheku.UXaba usho lokhu ngesikhathi ehola amalungu eKomidi Eliphezulu likaMasipala ekuhambeleni le ndawo ukuyohlola umsebenzi oqhubekayo.
Lesi sikhungo siyingxenye yohlelo lukaMasipala lokubhekana nenkinga yabantu abahlala emigwaqweni, ngenhloso yokubahlinzeka ngendawo ephephile nenesithunzi abazohlala kuyo ngesikhathi besizwa ukuthi babuyele emphakathini.
Uthe ngaphandle kokubahlalisa, lesi sikhungo sizophinde sihlinzeke ngezinhlelo zokufundisa amakhono empilo nokweseka labo ababhekene nenkinga yokusebenzisa kabi izidakamizwa ukuze bakwazi ukuqala impilo entsha.
“Lokhu ngeke kube yijele labantu abangenamakhaya. Uma sebethole usizo, beqeqeshiwe futhi sebehlome ngamakhono empilo, bazobuyiselwa emindenini yabo. Asilindele ukuthi bahlale isikhathi esingaphezu kweminyaka emibili kulesi sikhungo,” kusho uXaba.
Isigaba sokuqala salo msebenzi sesiphothuliwe, okubalwa kukho ukulungiswa nokwandiswa kwesakhiwo sokuphatha, ukwakhiwa kwendawo yonogada, isikhungo esinemisebenzi eminingi, imigwaqo yokungena kanye nezindawo zokupaka izimoto.
Njengamanje kuyaqhubeka isigaba sesibili, esizobandakanya amabhulokhi amabili okulala, izindlu zangasese nezokugezela kanye nesikhungo sokuhlanza indle.
Lo msebenzi kulindeleke ukuthi uqedwe ngokuphelele ekuqaleni kuka-2027.
Ekuqaleni lesi sikhungo sasihlelelwe ukuhlalisa abantu abangu-400, kodwa ngenxa yokwanda kwesidingo sezindawo zokuhlalisa abangenamakhaya, umthamo waso usukhushulwe wafinyelela kubantu abangu-800.
Uma sesiphothuliwe, lesi sikhungo kulindeleke ukuthi kuqiniswe kakhulu uhlelo lweTheku lokusiza abantu abangenamakhaya ngokubanikeza indawo yokukhosela yesikhashana, izinsiza zenhlalakahle kanye namathuba okubuyela empilweni ejwayelekile.
Don’t miss what’s happening in your area. Subscribe for updates.
