Umbukiso wezamabhizinisi waseThekwini, i-Durban Business Fair (DBF), uyaqhubeka nokuba yinkundla eguqula izimpilo zosomabhizinisi, ikakhulukazi entsheni, ngokubanikeza amathuba okukhulisa amabhizinisi abo, ukuwafaka ezimakethe ezintsha kanye nokuwaxhumanisa namazwe omhlaba. Amanye amabhizinisi athe chithisaka kubalwa kuwo awezinto zokugcoba ukuthunga Kanye nemvunulo.
Lokhu kuvezwe ngosomabhizinisi abahlukene abake baba yingxenye yalo mbukiso iminyaka eminingi, abathi i-DBF ibenze bakwazi ukufeza amaphupho abo nokwakha amabhizinisi asezingeni. Phakathi kwabo kukhona uNksz uThando Mdladla, ongumsunguli webhizinisi i-Uthando Glow Beauty and Wellness, othe lo mbukiso ube yisikhonkwane esiguqule ikusasa lakhe.
U Nksz Mdladla uthe waqala ngokuletha imikhiqizo embalwa yokunakekela isikhumba embukisweni, kodwa ngenxa yokuthola ulwazi, ukuxhumana nabanye osomabhizinisi kanye nokwesekwa, ibhizinisi lakhe selikhule laba yibhizinisi eliphelele elinikeza izinsiza zobuhle ezisezingeni eliphezulu.
“Umbukiso ungivulele amathuba amaningi engangingawacabangi, wanginika ukubonakala kanye nokwethenjwa ngabantu. Ngaze ngathola ithuba lokuyokhombisa imikhiqizo yami ephesheya eGhana, okuyinto ekhombisa ukuthi uma unikezwa inkundla efanele, ibhizinisi lingakhula lifinyelele kude” kusho u Nksz Mdladla.
Uthe useyingxenye ye-DBF iminyaka eyisithupha ilandelana, kanti okugqamile kuye wukuwina kwakhe umklomelo we-Excellence Awards ngaphansi kwesigaba sentsha ngonyaka odlule. Uveze ukuthi lokhu kwenza ibhizinisi lakhe laqashelwa izikhungo ezinkulu ezifana ne-National Youth Development Agency kanye ne-Durban University of Technology Centre for Social Entrepreneurship, okuphinde kwavula eminye iminyango yamathuba.
Ngakolunye uhlangothi, uNksz uCeliwe Ntuli ongumnikazi weZulu Brides, naye osebe yingxenye yalo mbukiso iminyaka eyisishiyagalombili, uthe i-DBF imsizile kakhulu ekukhuliseni ibhizinisi lakhe nasekutholeni amakhasimende amasha.
“Ukubonakala kwethu kulo mbukiso kusixhumanise nezimakethe ezintsha futhi kwasivulela amathuba okusebenza nabantu abaningi. Ngaphezu kwalokho, izifundo nemihlangano esiyitholayo lapha isifundisa ukuphatha ibhizinisi ngendlela ehlelekile nezinzile”. kusho uNtuli.
Uqhube wathi ukuxhumana nabanye osomabhizinisi kanye nochwepheshe kule ngosi kubasiza ukwabelana ngolwazi nokwakha ubudlelwano obuqinisa amabhizinisi abo.
Umbukiso ka-2026 kulindeleke ukuthi ube mkhulu kakhulu njengoba uzobanjelwa e-Durban Exhibition Centre kusukela mhla zingama-30 kuMbasa kuya kumhla zi-2 kuNhlaba. Uzohamba ngaphansi kwesiqubulo esithi “Iminyaka engu-28 ixhumanisa ama-SMME nezimakethe namathuba”.
Lo mcimbi uzoba nezinhlelo eziningi ezifaka phakathi izinkulumo zochwepheshe, ama-workshop okuthuthukisa amakhono, amathuba okuxhumana phakathi kosomabhizinisi, kanye nezinkundla zokuxoxa ngezinto ezintsha, uxhaso kanye namathuba okuhweba emhlabeni jikelele. Kuzophinde kube nesigaba samazwe ngamazwe lapho osomabhizinisi bezothola khona ithuba lokuxhumana nezimakethe zangaphandle.
Abahlela lo mbukiso bakhuthaza kakhulu osomabhizinisi abangakabhalisi ukuthi benze lokho ngokushesha njengoba izindawo zokubukisa sezisondela ekugcwalisekeni, kanti umnqamulajuqu wokubhalisa ungomhla ka-17 kuMbasa.
Usihlalo weKomidi lezoThuthukiso loMnotho noHlelo, uKhansela uThembo Ntuli, uthe i-DBF iyaqhubeka nokuba yinkundla ebalulekile ekwakheni nasekukhuliseni amabhizinisi. Uthe lo mbukiso awugcini nje ngokwakha amabhizinisi, kodwa futhi udala amathuba emisebenzi, ukhuthaza ukusungulwa kwamabhizinisi amasha futhi uqinisa umnotho wendawo.
“Le ngosi ivula iminyango, yakha amabhizinisi aqinile futhi ixhumanisa osomabhizinisi namathuba angokoqobo. Sifuna ukubona osomabhizinisi abaningi bethatha leli thuba ukuze bakhulise amabhizinisi abo” kusho uNtuli.
Don’t miss what’s happening in your area. Subscribe for updates.
