IMeya yomkhandlu I e-eThekwini Municipality, uCyril Xaba, uthi ukwethulwa kwezithombe zabaholi bomzabalazo u Nelson Mandela no Oliver Tambo kuzoba yisikhumbuzo esihle somlando wenkululeko futhi kukhuthaze izizukulwane ezizayo ukuba zifunde ngomzabalazo owakha iNingizimu Afrika yanamuhla. UXaba ubekhuluma ngesikhathi kwamukelwa uMengameli Cyril Ramaphosa emcimbini wokwethulwa kwezithombe.
Ekhuluma emcimbini, uXaba uthe kuyintokozo enkulu ukwamukela izivakashi nabaholi abazohlanganyela ekukhumbuleni laba baholi bomzabalazo. “Kuyangijabulisa ukwamukela nonke kulo mcimbi ohloniphekile njengoba sikhumbula futhi sihlonipha amaqhawe omzabalazo wethu, uMengameli wangaphambili uNelson Mandela kanye noBaba uOliver Reginald Tambo.” Kusho u Xaba.
UXaba ubalule ukuthi indawo lapho zibekwe khona lezi zithombe ibalulekile emlandweni wezwe. “Isithombe sikaMandela sikhumbuza abantu inkulumo yakhe eyaba negalelo elikhulu ekwakheni ubumbano ngesikhathi ephuma ejele ngo-1990.” Kusho u Xaba.
UMengameli wezwe, uCyril Ramaphosa, wembule izichuse zemfanekiso yabaholi bomzabalazo benkululeko u Dr Nelson Mandela no Oliver Tambo e Thekwini.
“ Lezi zithombe ziqhakambisa I galelo elikhulu elenziwa nguMandela noTambo emzabalazweni wenkululeko, ubulungiswa emphakathini kanye nokwakhiwa kweNingizimu Afrika yentando yeningi. Izikhumbuzo ezifana nalezi zisiza ukugcina umlando wesizwe uphila futhi zifundise nezizukulwane ezisakhula ngomlando wokulwa nobandlululo.” Kusho u Ramaphosa.
U Mengameli uthi lo mcimbi ubalulekile njengoba izwe ligubha iminyaka engu-30 kusukela kwamukelwa uMthethosisekelo wentando yeningi. U Tambo wadlala indima ebalulekile ekwakheni izimiso zomthethosisekelo we-ANC kanti uMandela nguyena owagcina esayine uMthethosisekelo waba umthetho.
“Izichuse zizophinde ziqinise ezokuvakasha kuleli dolobha futhi zikhumbuze abantu ukuthi inkululeko yatholwa ngemizabalazo emikhulu. Izwe kumele liqhubeke nokulandela izimfundiso zikaMandela noTambo zokusebenza ngobuqotho, ukuthula nokusebenzela abantu”. kusho u Ramaphosa.
URamaphosa uphinde wamemezela ukuthi iSouthern African Development Community (SADC) izobamba ingqungquthela yayo yama-46 yabaholi bamazwe eThekwini ngo-Agasti 2026.
Don’t miss what’s happening in your area. Subscribe for updates.
