UMasipala ITheku uyaqhubeka nokuletha ithemba kubafundi abaswele ngokuhambisa izimpahla zokufunda nezokugqoka ngaphansi kohlelo lwe Back-to-School, ngenhloso yokuthi izingane ziqale unyaka eskoleni zinakho konke okudingekayo.
Kulolu hlelo, abafundi bathole izimpahla zokubhala, umfaniswano wesikole kanye namaphakethe esithunzi (sanitary bags) aqukethe izinto zokuhlanzeka komzimba. Lokhu kusiza ukususa izithiyo ezifana nokungabikhona kwezimpahla, okuba nomthelela ekungangeni kahle esikoleni, ekugxileni nasekuzethembeni kwabafundi. Iskole samabanga aphezulu I Bhekisisa High school nayo ingezinye zezikole ezihlomulile ngezinsiza zokufunda.
Ukuhambisa lezi zinsiza bekuholwa nguSihlalo weKomidi leZokubusa nezabasebenzi, uKhansela uNkosenhle Madlala, ogcizelele ukuzibophezela kukahulumeni wedolobha ekubuyiseleni isithunzi nasekusekeleni abafundi abaswele.
Lolu hlelo lwenziwa minyaka yonke ekuqaleni konyaka wesikole, luhlose ukuhlinzeka abafundi abasuka emindenini entulayo ngomfaniswano, izimpahla zokubhala kanye namaphakethe esithunzi aqukethe izinto zokuhlanzeka ezibalulekile. Luhlelwa yiHhovisi Lokuthuthukiswa Kwentsha njengengxenye yemizamo yedolobha yokuthuthukisa imiphumela yezemfundo nokweseka imindeni ebhekene nobunzima.
Ekhuluma kulo mcimbi, uKhansela Madlala uthe kubalulekile ukuthi izidingo eziyisisekelo zabafundi zihlangatshezwe.
“Uma sinikeza abafundi umfaniswano namaphakethe esithunzi, sisekela ukufunda futhi sibuyisela isithunzi nokuzethemba kwentsha yethu. Lolu hlelo alugcini ngokunikela ngezimpahla kuphela sibheka nezinkinga zomphakathi eziyisisekelo ukuze kutholakale izixazululo ezithuthukisa izinga lemfundo,” kusho u Madlala.
Kule ndawo kusizakale abafundi abangu-40, kanti lolu hlelo luzoqhubeka nakwezinye izikole ezikhethiwe ngaphakathi kweTheku. Kusukela lwaqala cishe eminyakeni eyishumi edlule, uhlelo lweBack-to-School selusizile abafundi abangaphezu kuka-5 000 ezikoleni ezingaphezu kuka-80.
Lo mcimbi ubuhanjelwe abamele uMnyango wezeMfundo, izinhlangano zothisha, iBhodi Eliphethe Isikole kanye nabaholi bomphakathi.
Don’t miss what’s happening in your area. Subscribe for updates.
