IHollywood yethule Umcimbi omkhulu wokugijima kwamahhashi nowokuzijabulisa e-Afrika, i-Hollywoodbets Durban July, eqala amalungiselelo omcimbi okulindeleke ukuthi uhehe izinkumbi zabantu futhi uhlanganise ezemidlalo, imfashini kanye namasiko.
Lomtelebhelo wethulwe e-Hollywoodbets Greyville Racecourse lapho abahleli bomcimbi bememe abaculi bemfashini, abaklami kanye nabazobukela imijaho ukuthi bathathe ugqozi ezindaweni zasemakhaya zaseNingizimu Afrika kanye nesiko lokufuya nokugijima kwamahhashi.
I-“Country Allure” ichazwa njengendlela yokuhlonipha ubuhle nobumsulwa bokuphila kwasemakhaya. Ikhuthaza ubuciko obususelwa emvelweni, emasikweni nasemlandweni wokuxhumana phakathi komhlaba nezemijaho yamahhashi. Abahleli bathi le timu igqamisa ubuhle bezindawo lapho amahhashi ekhuliselwa khona futhi iqhakambisa nobukhazikhazi obuhambisana nalo mcimbi.
I-Hollywoodbets Durban July ihlala ingeminye wemigubho emikhulu yezemidlalo nezokuzijabulisa eNingizimu Afrika, iheha izivakashi ezivela ezweni lonke nakwamanye amazwe. Ngaphandle kokujabulisa, lo mcimbi udlala indima enkulu ekukhuliseni umnotho waKwaZulu-Natal.
Ngonyaka odlule, lo mcimbi wadonsa abantu abangaphezu kuka-40 000 futhi wanikela cishe ngo-R840 million emnothweni wedolobha, wadala amathuba emisebenzi angaba ngu-4 500 emikhakheni ehlukene. Izinga lokugcwala kwamahhotela lafika ku-80% ngesikhathi seviki lomjaho, okukhombisa ukubaluleka kwawo embonini yezokuvakasha.
Umcimbi wango-2026, ohlelelwe umhla zine kuNtulikazi, kulindeleke ukuthi ube mkhulu kakhulu kunangaphambilini, njengoba iTheku liqhubeka nokuzibeka njengendawo ehamba phambili ekusingatheni imicimbi emikhulu.
Abahleli bathi iHollywoodbets Durban July akusikho nje ukugijima kwamahhashi kuphela, kodwa iyinhlanganisela yezemidlalo, imfashini esezingeni eliphezulu kanye nokuzijabulisa. Ngetimu ethi “Country Allure”, izivakashi zingalindela okuhlangenwe nakho okusha okuhlanganisa ubuhle basemakhaya nobukhazikhazi bosuku lomjaho.
Njengoba amalungiselelo eqhubeka, wonke amehlo azobheka eThekwini lapho abantu bezohlangana khona ukuzozibonela usuku olugcwele injabulo, ubuhle nobukhazikhazi obungasoze balibaleka.
Don’t miss what’s happening in your area. Subscribe for updates.
