1
0
BEKONGAPHANSI ongaphezulu kumjaho i-Harry Gwala District Marathon 2025 eyenzeke mhla zinga 23 kuNdasa 2025, ngaphansi kwendikimba ethi “Ubumbano Nokukhuthazela.” Lo mcimbi ubuhlanganise abasubathi abangaphezu kuka-2 000 abavela ezindaweni ezehlukene abazoqhudelana emjahweni ongu-42.2km, 21.1km no-10km. I-5km fun run ibivulekele amalungu omphakathi afuna ukubamba iqhaza.
Lo mcimbi wenzeke wayimpumelelo ngoxhaso lwabaxhasi abehlukene okubalwa kubo no-Ayusha. IMeya yesiFunda iHarry Gwala, uMnuz Z.D Nxumalo, igcizelele ukubaluleka kokubumbana komphakathi ngesikhathi kuvulwa umcimbi. Uthe, “Namuhla, sihlangana ngenhloso yokwethula iHarry Gwala District Marathon. Kuyasijabulisa ukubona inqubekelaphambili eseyenziwe kule minyaka eyishumi edlule ekukhuthazeni impilo enempilo nokwakha umphakathi ongcono.”
UNxumalo uphinde wabonga abaxhasi wathi, “Ngithanda ukudlulisa ukubonga kubo bonke abaxhasi abenze lo mcimbi waba khona. Lokhu kubambisana akugcini nje ngokuthuthukisa impilo enempilo kodwa kunomthelela ekukhuleni komnotho womphakathi wethu.”
Lo mqhudelwano ukhombise ukubekezela kwabasubathi bakuleli okubalwa kubo uSinenhlanhla Ntshangase oqophe umlando enqoba esigabeni sabesilisa sika-42.2km. UNtshangase uthe, “Ngizizwa ngihloniphekile ngokuma eduze komuntu obaluleke njengeMeya uNxumalo. Bengingakaze ngicabange ukuthi ngingazuza into efana nalena kodwa namuhla iyenzeka.”
UNkss Rholex Kogo naye uqophe umlando enqoba esigabeni sabesifazane sika-42.2km. Ukuzimisela kanye nesibindi sakhe kusebenza njengesikhuthazo kumantombazane nabesifazane abancane.
Yize umcimbi ube yimpumelelo kodwa kube nezingqinamba ngokuphakelwa kwamanzi. Nokho, ama-marshal nabezimo eziphuthumayo baqinisekisa ukuphepha kwabagijimi.
Inani elikhulu lezibukeli likhulise umnotho wendawo, amabhizinisi endawo enze inzuzo enkulu.
IMeya uNxumalo igqugquzele intsha kanye namalungu omphakathi ukuthi asebenzise leli thuba ukuveza amakhono abo nokwakha impilo engcono. Uthe, “Abagijimi bakuleli, ikakhulukazi intsha, kumele basebenzise lo mgijimi ukukhombisa amakhono abo futhi balwele ukubamba iqhaza emicimbini emikhulu efana neComrades Marathon.”
IHarry Gwala Marathon 2025 ikhombisa ukubekezela, ubumbano nokwakha umphakathi. Umcimbi ukhombisa amandla okusebenzisana nokwesekana ekuzuzeni impumelelo. Abagijimi abafana noSinenhlanhla Ntshangase noNkss Rholex Kogo bavule indlela ukuze izizukulwane ezizayo zilandele ezinyathelweni zabo. Umphakathi waseHarry Gwala ubheke ngabomvu ikusasa eliqhakazile elakhelwe phezu kobumbano, ukubekezela, nenqubekela phambili ngokuhlanganyela.
