Inyuvesi I Durban University of Technology (DUT) isihalalisele umfundi wayo owenza unyaka wesithathu ezifundweni zeDiploma in Business and Information Management, uNhlakanipho Ngwenya, osayine neqembu leBetway Premiership, iTS Galaxy FC.
UNgwenya, odabuka eMayflower eMpumalanga, umenyezelwe ngokusemthethweni yiTS Galaxy FC njengomunye wabadlali abasha beqembu abazodlala ngesizini ka-2026/27. Lokhu kumenza abe ngomunye wabafundi baseDUT asebephenduke abadlali bebhola elisezingeni.
Uqale uhambo lwakhe lwebhola eDUT ngo-2024 ngesikhathi evelela emqhudelwaneni wabafundi abasha, iFreshers Cup, okwamholela ekutheni aqokelwe iqembu lebhola laseNyuvesi. Wabuye wabhala umlando ngokushaya amagoli okuqala eDUT emqhudelwaneni weVarsity Football, okuhlanganisa negoli elisize iqembu lalinganisa ngesikhathi libhekene neTshwane University of Technology (TUT).
Ngaphandle kweVarsity Football, uNgwenya uphinde wasiza i-Upton Residence yanqoba isicoco seDUT Residence League ngo-2024, ekhombisa ikhono lakhe kusukela esemncane.
Ekhuluma ngale mpumelelo, uNgwenya uthe uzizwa sengathi iphupho lakhe selifezekile.
“Kuzwakala sengathi ngiyaphupha. Sekunesikhathi eside ngifisa ukudlala kuBetway Premiership. Ngibonga uNkulunkulu kanye noSihlalo weTS Galaxy ngokungikholwa nangokunginika leli thuba,” kusho u Ngwenya .
Uhambo lwakhe lusuke eDUT FC lwadlulela kwiDurban City FC ngaphambi kokuthi asayine neTS Galaxy FC, okuwubufakazi bokuthi ezemidlalo zasemanyuvesi zingavulela abafundi amathuba okufinyelela ebholeni elikhokhelwayo.
Inyuvesi imfisele impumelelo Ngwenya njengoba eqala lesi sigaba esisha somsebenzi wakhe neTS Galaxy FC, ngesikhathi eqhubeka nezifundo zakhe eDUT.
Don’t miss what’s happening in your area. Subscribe for updates.
